- ಗೋಪೀನಾಥ ರಾವ್

ಮುಂಬೈ ಮಹಾರಾಷ್ಟ್ರಿಗರಿಗೆ ಮಾತ್ರ ಸೇರಿದ್ದು ಅನ್ನುವ ಕೂಗು ಹಿಂದೊಮ್ಮೆ ಕೂಡ ಬಂದಿತ್ತು. ಆಗ ಈ ಮಾತನ್ನು ಹೇಳಿದ್ದು ಬಾಳಾ ಠಾಕರೆ. ಸುಮಾರು ಮೂರು ದಶಕಗಳ ನಂತರ ಇತಿಹಾಸ ಪುನರಾವರ್ತನೆಯಾಗಿದೆ. ಈ ಬಾರಿ ಈ ಸೊಲ್ಲೆತ್ತಿದವರು ಬಾಳಾ ಠಾಕರೆಯ ಅಳಿಯ ರಾಜ್ ಠಾಕರೆ. ಉದ್ದೇಶ ಒಂದೇ- ತನ್ನ ಬೇರು ಗಟ್ಟಿಮಾಡಿಕೊಳ್ಳುವುದು.

ರಾಜಕೀಯದ ಮಂದಿಗೆ ತನ್ನನ್ನು ನಾಯಕನನ್ನಾಗಿಯೇ ಉಳಿಸಿಕೊಳ್ಳಲು ಹಲವು ಮಾರ್ಗಗಳಿವೆ. ಹಿಂಬಾಲಕರುಗಳಲ್ಲಿ ಲೀಡರು ಅನ್ನಿಸಿಕೊಳ್ಳಬೇಕಾದವರು ತನ್ನ ನಾಯಕತ್ವದ ಲಕ್ಷಣಗನ್ನು ಆಗಾಗ ತೋರಿಸಬೇಕಾಗುತ್ತದೆ. ಇನ್ನಿತರ ಮರಿ ಪುಢಾರಿಗಳು ಮೇಲೇರಿ ಬರದಂತೆ ನೋಡಿಕೊಳ್ಳಬೇಕಾಗುತ್ತದೆ. ಅದಕ್ಕೆಂದೇ ಬರಿಗಣ್ಣಿಗೆ ನ್ಯಾಯವೆಂದು ಕಾಣುವ ಈ ರೀತಿಯ ಆಕರ್ಷಕ ಸ್ಲೋ 'ಗನ್ನು'ಗಳು ಉಪಯೋಗಕ್ಕೆ ಬರುತ್ತವೆ. ಮೇರು ವ್ಯಕ್ತಿತ್ವವನ್ನು ಕೆಣಕುವುದು ಒಂದು ದಾರಿ. ಸಂಸ್ಕೃತಿಯ ಮೇಲೆ ಧಾಳಿಯನ್ನು ಪ್ರತಿಭಟಿಸುವುದು ಇನ್ನೊಂದು ದಾರಿ. ಪ್ರಾದೇಶಿಕತೆ, ಭಾಷೆ, ಜಾತಿ ಭಾವನೆಗಳನ್ನು ಕೆಣಕುವುದು ಇನ್ನೊಂದು ದಾರಿ. ಹೇಳಿಕೆ ಆಕರ್ಷಕವಾಗಿ ಕಾಣುವ ಇನ್ಯಾವುದೇ ದಾರಿಯೂ ಆದೀತು- ಅಗತ್ಯ ಅಂದರೆ ಸುದ್ದಿಯಾಗಬೇಕು ಅಥವಾ ಸುದ್ದಿಯಲ್ಲಿರಬೇಕು.
ರಾಜ್ ಥಾಕರೆಗೆ ಮನಸ್ಸಿದ್ದರೆ ಅಮಿತಾಭ್ ರನ್ನು ನೇರವಾಗಿ ಕಂಡು ಮುಂಬೈಯಲ್ಲಿ ಕಾಲೇಜು ಹಾಕಿಸುವಂತೆ ಕೇಳಿಕೊಳ್ಳಬಹುದಿತ್ತು. ಬರೇ ಅಮಿತಾಭ್ ರನ್ನೇ ಏಕೆ, ಹೊರಪ್ರದೇಶದಿಂದ ಬಂದ ಎಲ್ಲರನ್ನೂ ಮುಂಬೈ ಅಭಿವೃದ್ಧಿಗೆ ಪಣತೊಡುವಂತೆ ಮನವೊಲಿಸಬಹುದಿತ್ತು. ಯಾರೆಲ್ಲ ಮುಂಬೈ ಅಭಿವೃದ್ಧಿಗೆ ಸಹಕರಿಸುತ್ತಿಲ್ಲವೋ ಅವರುಗಳ ಹೆಸರು ಬಹಿರಂಗ ಪಡಿಸಬಹುದಿತ್ತು. ಅದನ್ನು ಬಿಟ್ಟು ಅವರ ಬಗೆಗೆ ಕೀಳಾಗಿ ಮಾತನಾಡುವುದು, ಧಮ್ಕಿ ನೀಡುವುದು ಪ್ರಚಾರಗಿಟ್ಟಿಸಿಕೊಳ್ಳುವ ತಂತ್ರ ಅಲ್ಲದೆ ಮತ್ತಿನ್ನೇನೂ ಅಲ್ಲ.. ಹೊರನಾಡಿನವರು ಬಿಡಿ, ಮುಂಬೈ ಬೆಳವಣಿಗೆಗೆ ಅದೇ ಪ್ರದೇಶದವರಾದ ರಾಜ್ ಠಾಕರೆ ಕೊಡುಗೆ ಏನು?

ನಮ್ಮ ಭಾಷೆ, ಸಂಸ್ಕೃತಿ, ನೆಲ ರಕ್ಷಿಸಬೇಕೆಂಬ ಮನಸ್ಸುಳ್ಳವರು ಒಗ್ಗೂಡಬೇಕು, ಒಟ್ಟಾಗಿ ಕೆಲಸ ಮಾಡಬೇಕು. ಹದಗೆಟ್ಟ ಮಾತನ್ನಾಡಿ ಸಾಮರಸ್ಯ ಕೆಡಿಸಬಾರದು. ಎಲ್ಲಿ ಯಾರೆದುರು ಸಮಸ್ಯೆ ಚರ್ಚಿಸಬೇಕೋ ಅವರಲ್ಲಿ ಮಾತ್ರ ಚರ್ಚೆಯಾಗಬೇಕು, ಚಳವಳಿ ಅವಕಾಶ ಹುಡುಕುವ ದುಷ್ಕರ್ಮಿಗಳ ಕೈಗೊಂಬೆಯಾಗಬಾರದು. ರಾಜಕೀಯ ಲಾಭದ ಅಳತೆಗೋಲು ಹಿಡಿಯುವವರನ್ನೆಲ್ಲ ಬದಿಗಿಟ್ಟು ನೈಜ ಸರಳ ನಿಲುವಿನಲ್ಲಿ ನಾಡು ಸಂಸ್ಕೃತಿ ಕಾಪಾಡುವುದಕ್ಕಿಳಿದರೆ ಕಾರ್ಯಸಾಧನೆಯಾಗುತ್ತದೆ. ಯಾರಗೋಜಿಗೂ ಇಲ್ಲದ ಎಚ್ ಎ ಎಲ್ ನೌಕರನಂತಹ ಶ್ರೀಸಾಮಾನ್ಯರು ಸಾಯುವುದು ತಪ್ಪುತ್ತದೆ. ಆದರೆ ಆ ರೀತಿಯ ಸಾಂಸ್ಕೃತಿಕ ನಾಯಕರೆಲ್ಲಿ? ನಮ್ಮಲ್ಲಿರುವುದು ನೆಮ್ಮದಿಯಲ್ಲಿ ಬಾಳಲು ಬಿಡದ ಥಾಕರೆಗಳು ಮಾತ್ರ!

ವಂದನೆಗಳೊಂದಿಗೆ,
ನಿಮ್ಮ ಸಂಗಾತಿ,
ಗೋಪೀನಾಥ ರಾವ್.

Bookmark/Search this post with:

 •    •    •